Ynformaasje
Tekst: Thomas Merton (yn Hinne Wagenaar, Zalige Simplicity, 166)
Bibellêzing: Jehannes 21:9-14 (NBV en Fryske Bibel)
Muzyk: "Ubi caritas" en "Tu es Petrus" fan The Stanford Chamber Chorale
Kleastermoarn woansdei 14 april 2021
It libben fan Peter en syn freonen is wer op it earste plak. Jezus waard fermoarde. De dreamen fan in nij libben en de idealen fan in nije wrâld binne wreed fernield. Wat moatte se no dwaan? Dan werom nei plein ien, nei it libben foar Jezus. Werom nei it fiskerslibben. Mar nettsjinsteande al it swit en muoite, der is gjin fangen, gjin werom. Se stride yn it tsjuster en de eleminten binne tsjin har: wyn, weagen, tsjuster. Dan krije se advys fan 'e wâl om har netten oer de oare tûke te smiten. En se fange fisk yn oerfloed. Blykber stiet de bêste stjoerman hjir wol oan wâl, yn it iere moarnljocht.
As se oan wâl geane, fine se op 'e grûn in koalfjoer mei brea en fisk derop. Alles is blykber klear om te dielen, te ûntfangen en te iten. Mar Jezus freget: "Bring ek wat fan 'e fisk dy't jo fongen hawwe." Se krije iten op 'e wâl, mar har eigen opbringst is fan belang. Dat moat der by! Hoe dreech ús bestean soms ek is, hoe lyts de opbringst liket, hoe tsjuster de nacht: ús bydrage is fan belang.
Om nei te tinken: As jo frege wurde 'wat fan jo opbringst te bringen', wat bringe jo dan?
Leave a Reply